1Cor 13 | DOB | STEP | 'Eguma 'igu onao bobo'adi, 'atuwa tologuguyao be aniloseyao 'idi ona, ta 'abo oboboma nigeya 'ateguya 'imiyami, 'igu loguguya nidi yage besobeso, 'atuwa sinaa siunuunu besobeso, nai yoguli simu'emu'e besobeso.

1 Corinthians 13

Oboboma

1 'Eguma 'igu onao bobo'adi, 'atuwa tologuguyao be aniloseyao 'idi ona, ta 'abo oboboma nigeya 'ateguya 'imiyami, 'igu loguguya nidi yage besobeso, 'atuwa sinaa siunuunu besobeso, nai yoguli simu'emu'e besobeso.

2 Ta wate 'eguma 'abo'agu Yaubada 'ina tosimana, be ma igu sinasinapu sinabwana bale'u be galewa manudi, nai 'eguma yaemisa 'ai'aila Yaubada 'enaya be 'enega yaona 'oya 'ediya, kapekapeyana sitatauya mali senaya, ta 'abo nigeya oboboma 'ateguya, 'abo'agu tuga tai besobeso.

3 Ta 'eguma 'igu gwegwe maibo'ana yaeguyaiye tomota 'ediya, be bwalagu wate yatagwale be sigabu 'idi taliya manuna, ta 'eguma nigeya oboboma 'ateguya 'imiyami, 'igu paisewa nidi uwadi geya'abo yalobaloba.

4 Ona'ai'aila, oboboma yage sinabwana, manuna 'eguma oboboma 'atedaya 'imiyami, sawesawedaya be tae'alama'i'itana be tomota ta'atenuwa 'ole'oleyedi, ta geya'abo tae'ipi'ipiyedi. Ta geya'abo wate tanuwanuwatu'e nai tagagasa, 5 ta esiya gosedao ta'amayabedi, be geya'abo gamwasowala nai etalauwala 'edega si'ita'ita. 6 'Enega geya'abo bubuna to'umalina manuna tagwaugwausowala, ta esi bubuna palupaluna manuna tada gwausowala.

7 'Eguma oboboma 'atedaya 'imiyami, yage maibo'ana sawesawedaya, be tada emisa ataya ma ida nuwayaina 'ada lema Yaubada 'enega ma'etamo manuna, be tuta maibo'ana tada toolopa'ala.

8 'Enega oboboma geya'abo 'igumwagumwala, ta esi taudi Yaubada 'ana tosimanao ma'etamo 'idi onao sigugumwala. Nadigega taudi mali 'enana be mali 'enana 'ediyega sionaona, ma'etamo 'enadina 'igugumwala. 9 Manuna gete tuga 'ida sinasinapu tupwana namo tuga, 'enega 'ida guguya tupwana namo wate, 10 ta tuta 'imeemai 'ediya sinasinapu auwauna maibo'ana 'iapwesama, be sinasinapu kadekadelina tanuwa pupule.

11 Nadigega 'abo'agu lowaenei gwama tuga, ta esi gete tuga ni'atu yaetai ga gogama 'idi onao be 'idi guinuwao be 'idi nuwanuwao ni'atu 'eguyega sigumwala. 12 Gete tugai 'ida mwalatoi nigeya sinabwana, 'atuwa ma'ama'ayau nadigega, nai kunuwadawada nadigega, ta esi ma'etamo be 'enega 'ana 'ai'aila 'ida apwesa 'edaya. Ta 'abo'agu sinasinapu tupwana namo yamwalamwalatoni, ta ma'etamo esiya maibo'ana yamwalatoni, nadigega gete tuga Yaubada 'imwalatoi 'ai'ailigu.

13 Yage sinabwadi 'etoi simiya ataya, nate emisa, be nuwayaina, be oboboma, ta maibo'adi 'ediyega oboboma 'isinabwa sinedi.